1. Hau sampinur, na tubu di dolok ni Sitapongan
Sai saur ma hamu matua bulung, jala tiur nang pansamotan
2. Eme na marbiur, di linggom ni hariara;
Sai torop ma pomparanmu jala maribur, huhut matakkang jala manjuara. 3. Hau simartolu, di tombak ni Panamparan;
Sahat ma hamu leleng mangolu di haliangi angka pom
paran.
4. Asa andor halumpang togutogu ni lombu, mamboan tu onan gambiri, Sai saur matua ma hamu pairing-iring pahompu sahat tu na marnono sahat tu na marnini.
5. Di ginjang ninna arirang, di toru pargomgoman,
Dao ma sian hamu hata sirang, tondi mu antong marsigonggoman. 6. Denggan ulos sirara, Tiur tiur dohot rambuna Sisina marsimata, Marsirat di unsuna. Sai manumpak ma antong Tuhanta Debata, Dilehon di hita pasupasuna, Tubu ma di hamu anak na marsangap, Dohot boru na martua. 7. Rimbur ni Pakkat tu rimbur ni Hotang,
Sai tudia pe hamu mangalakka, sai tu sima hamu dapot pansamotan. 8. Tubu ma halosi di dolok ni Pintu batu,
Hami Tulangmu na mangulosi, Debata do ianggo na mamasu-masu. 9. Sahat sahat ni solu, sahat di binsar ni mata ni ari,
Pasahaton nami ma ulos holong si ganjang rambu on, leleng ma hamu mangolu di iringiring Tuhanta ganup ari.
10. Martintin so paruton, margolang-golang so tostosan
Sai tiur ma dalan boluson, tio nang mual dapotan
