- JOUJOU MARSOMBA TU DEBATA (L : Liturgis ; R : Ruas)
L : Huria na hinaholongan ni Tuhan Jesus, atas goar ni saluhut Parhalado ni hurianta, pinasahat ma tabe tu sude hamu : Asi ni roha ma di hamu dohot dame na sian Debata Ama dohot sian Jesus Kristus Tuhanta i. Marpungu do hita sadarion saluhut ruas dohot pangula ni huria laho manghalashon pandonganion ni Debata di taon 2022 naung salpui, jala martangiang tu adopan ni Debata laho mangido asi ni rohaNa di na mamolus taon 2023 on.
R : Godang ma tongon na binahen ni Jahowa tu hita. Jadi marlas ni roha ma hita disi.
L : Tung so tarasam do balga ni holong ni roha ni Debata dipardalanan ni hurianta, jala tung so hasuhatan do denggan ni basaNa. Antong tahaholongi ma Debata sian nasa roha, ateate dohot nasa pingkiranta. Pillit ma sadarion, manang na ise do sioloanmu : hagogoon portibion do manang Debata silehon hangoluan? Pillit ma sadarion manang na ise sisombaonmu : debata sileban do manang Debata sitompa langit doho tano?
R : Alai anggo ahu dohot donganhhu sajabu, Debata do sioloan dohot sisombaon nami.
L : Dibohali hurianta HKBP do hita mandalani taon on dohot Thema Orientasi Pelayanan : “Tahun Profesionalisme”, na nienet sian Hata ni Tuhanta di Pilippi 2:12. On ma Partangiangan pamuhai di hurianta, laos mulaanta ma muse partangiangan wijk, dohot angka kegiatan kategorial ni huria. Antong, marlas ni roha ma hita. Itasomba ma Ibana, itapuji ma goarna. Endehononta ma “Sangap di Jahowa”.
R : Marende BE. No. 581 : 1 + 3 “Sangap di Jahowa”
Sangap di jahowa na sun timbul i, balga ni holongNa ndang tarasam i
Dilehon AnakNa na sasada i, manobus hita jolma pardosa i
Reff : Puji ma Debata ale manisia. Las roham las roham somba ma Debata
Dapothon Jahowa na sun timbul i, marhite AnakNa Tuhan Jesus i
—Jongjong—
Balga situtu pambaenMi Debata, tung so hasuhatan holong ni rohaM
Tu jolma pardosa asi do rohaM, diungkap Ho dalan lao tu banuaM. Reff :
- VOTUM : A.IV / A.4 – D.IV/15 (Hundul)
- MARENDE BE. NO. 587 : 2 TAENDEHON LAS NI ROHA
Taendehon las ni roha sipadame roha i. Tung dao do badabada dohot angka hosom i
Hadameon ni Tuhanta i do sihirimon i
Tapalambas ma rohanta mida angka dongan i. Na martua do sude na lambok marroha i
- EPISTEL
L : Hata ni Debata Turpuk Epistel di partangianganta tingki on, tarsurat di Job 12 : 13 – 25. Songon on ma didok disi :
13 Mandapot di Ibana habisuhon dohot hagogoon, di Ibana do panuturion dohot panimbangon.
14 Ida ma, Ibana mangarumpakkon, gabe ndang be dapot paulion, Ibana mangkurungkon sada baoa, gabe ndang adong na tuk paluahon.
15 Ida ma, Ibana maniopi aek gabe marsik luhutna i, Ibana muse palungkashon, gabe marbalik tano on dibahen.
16 Mandapot di Ibana do hagogoon dohot hapantason, guru di Ibana jolma na lilu dohot na mangaliluhon.
17 Ibana manogihon angka panuturi hira tabantaban, jala maoto angka panguhumi dibahen.
18 Ibana mangkarhari uhum roharoha ni angka raja, jala dihohoshon rante tu gontingnasida.
19 Ibana manogihon angka malim bahen tabantaban, jala ditinggangkon tu tano halak na marhuaso.
20 Ibana mangunsat pamollungon sian halak na pir tahak, jala dibuat panuturion sian halak na tuatua.
21 Ibana mangusehon haleaon tu angka raja, jala dipahondur hohos ni halak na begu.
22 Ibana papatarhon angka na buni sian haholomon, jala diboan do tu hatiuron linggoman ni hamatean.
23 Ibana patimbulhon angka bangso, jala diago muse; Ibana pararathon angka bangso jala dipaundar muse.
24 Ibana mangunsat roha sian angka partogi ni bangso di tano on, jala dililuhon nasida di halongonan soada dalan.
25 Jadi dadapdadap nasida di haholomon so marhatiuron, jala rabatrabat nasida dibahen songon halak na mabuk.
Ido sahatna. Martua do angka na tumangihon Hata ni Debata, jala na umpeopsa.
R : Amen.
- KOOR : LANSIA
- MARENDE BE. NO. 275 : 1 O JESUS TUHANHI
O Jesus Tuhanhi, Ho siparmonang i, Raja tongtong
Ndang na margogo au, molo so Ho di au. Ipe dongani au di tano on
- MANGHATINDANGHON BASA NI DEBATA – MANABUR BONI
L : Ale Tuhan Debata, naposoM do hami na marpungu di bona ni taon 2023 on, mangalompit tangan mandok mauliate tu Ho, marsada ni roha pasahathon dirinami tu Ho.
R : Jalo ma hami dibagasan holongMu.
L : Jongjong ma Ho ditongatonganami jala ingani ma ateate dohot pingkirannami. Asi ma rohaM di sude keluarganami dohot disude ruas ni huriaM, na marsahit, na dibagasan arsak ni roha, na marungkil, namandele, namangadopi hasusaan.
R : O Jesus na gok pasupasu, na mangondihon halak na gale, halak na pogos, halak na ginosagosa… apulima nasida saluhutNa. Pargogoi ma nasida saluhutna dibagasan panghirimon na mangolu di roti hangoluan na sian banuaginjang asa sombu panghilalaan nasida.
L : Sataon manipat nunga tahobasi huriaNa… Nuaeng jongjong ma hita di bona ni taon 2023 mandok mauliate tu Kristus na mandongani jala na patauhon hita manghobasi huriaNa.
R : Ibana do na patauhon hita jala na pataru hita sahat tu bona ni taon on.
L : Disaluhut angka na masa, di las ni roha nang arsak, tadapothon ma Kristus silehon hangoluan i. Dibagasan Ibana jumpang hita do sonang ni roha. Dibagasan Ibana taruli do hita di dame dohot sonang ni panghilalaan. Di bagasan Tuhan i taruli do hita di gogo na imbaru. Ido pos ni rohanta mandalani taon on, laho mamonai nasa panghobasion i di tongani huria, Wijk, nang kategorial pe.
Laos di Partangianganta tingki on patupaonta do acara manabur boni. Paingothon hita do ulaon on paboa ndada ala ni gogonta manjadi saluhut na taula, alai na ro ma hita tu adopan ni Debata pasahathon nasa hadirionta di na laho mangula ulaonta i. Ro ma hita tu adopan ni Debata asa Ibana na mandongani, mangurupi, manumpahi jala mamasumasu ulaonta i. Nuaeng pe, jongjong ma hamu, asa tapangido ma asi ni roha ni Debata mamasumasu nasa si suanonta i. Marende ma hita. BE. No. 373 : 1, “Mangula hita jolma”.
R : Mangula hita jolma Manabur boni i Alai anggo jadina di Debata do i
Dilehon las ni ari nang nambur udan pe. Tongtong di panumpakNa marguru sasude.
Nasa ulibasa ro sian Debata, i pe Ibana puji ma huhut haposi da
Pdt: Naeng tangihononta ma Hata ni Debata pasinghophon dohot padasiphon i saluhutna, laho pahothon, patoguhon rohamuna manabur boni i.
Manjaha Ayat :
1 Musa 8 : 22
22. Onpe, saleleng adong tano on, ndang jadi mansohot saburon dohot gotilon, ari ngali dohot ari las, ari logo dohot rondo ni ari, arian dohot borngin.
Hesekiel 34 : 26 – 27
26. Dung i bahenonku ma nasida dohot angka na humaliang dolokdolokku gabe pasupasu, jala ahu parohon udan di tingki halehetanna, gabe angka udan parpasupasuan do i.
27. Jala lehonon ni hau di ladang do parbuena, jala lehonon ni tano i do gogona, jala marsonangsonang nasida di tanonasida i, asa tung ditanda nasida ahu do Jahowa, ia dung huponggolhon angka hau ni auganasida i, jala hupalua nasida sian tangan ni halak angka na marhatobanhon nasida.
R : Marende BE No. 309 : 1 “Raphon Tuhan Jesus I”
Raphon Tuhan Jesus i pungka ulaonmu, Ingkon tu Ibana i parguruhononmu,
Baen Ibana donganmi hehe dohot modom. Dege ma bogasNa i rohami pahohom.
R : Ale Tuhan, mangasahon HataM na badia i do hami. HataM na mandok : Manang ise na mangula tanona, bosuran ma di sipanganon; alai anggo halak na mangolooloi marlanggelangge, hurangan roha do. ( Poda 12 : 11).
Sapala naung di loas asi ni rohaM hami manguduti ulaonnami, sai paborhat ma hami di bagasan pos ni roha dohot panghirimon na togu. Pasupasu ma hami laho mangulahonsa, pasupasu ma nang na ni ulanami.
Pdt: Mangasahon asi ni roha ni Debata Ama dohot Jesus Kristus dohot Tondi Parbadia do au mandok tu hamu “Pos ma rohamu, ulahon hamu ma ulaon muna, ai sian Jahowa sitompa langit dohot tano on do ro pangurupion tu hamu”.
Martangiang ma hita : Ale Tuhan Debata, Amanami na di banua ginjang. Ho do nampuna langit dohot tano on ro di pangisina sudena. Jadijadian ni tanganMu do sude na adong jala na pinarmuduM do hami na tinompaMon. Napungu do hami nuaeng di joroMon mangido tu Ho : Sai digohi asi ni rohaM ma sude ngolunami, sai lehon ma udan dohot las ni ari di tingkina be, na pagabehon na hula hami, asa jumpang hami parbue na denggan bahen hangoluan dohot sipanganon siganup ari. Sai lam patandahon ma tu hami godang ni denggan ni basaM, asa huboto hami mandok mauliate tu Ho dohot mamuji GoarMu na badia i marhitehite Tuhan Jesus Kristus, Tuhannami. Amen. (Ruas hundul)
—Uluan Pasahathon celengan tu na mewakili ruas sian ganup Wijk—
- MARENDE BE. NO. 471 : 1 HUPILLIT JESUS DONGANKI
Hupilit Jesus donganki lao mangoloi Ibana.
Nang muruk pe torop disi labangku do Ibana.
Di Ho ngolungku ro diajalhu Jesus di Ho au, mate, mangolu
Di Ho ngolungku ro diajalhu Jesus di Ho au, mate, mangolu
- JAMITA : 1 KORINTUS 1 : 26 – 31
- MARENDE BE. NO. 186:1— JAHOWA DO HAPOSANKI (Pelean)
Ay. 1. Jahowa do haposanhi, na mangapoi rohangku
Na patiurhon dalanhi, bulus dibaen langkangku
Sonang tongtong, rohangkinon, binaen ni Debatangku. PatikNa do lomongku
Ay. 2. Na tau haposan situtu do Ho, o Debatangku
Ai Ho do na tongtong burju, mambaen hangoluanhu
Na gogo Ho, sai tulus do, sinangkap ni rohaMu, pasaut na pinungkaMu
—Musik—
Ay. 3. Ndang dung dihalupahon Ho sude na holong roha
Di Ho ai sai dapotsa do, na tau apulapulna
Tung sonang do, dibahen Ho, na sai tongtong porsea, malua sia jea
11.TANGIANG PANUTUP : Pelean – Ale Amanami – Pasupasu
Contoh SUSUNAN PANITIA NATAL AMA – INA TAHUN 2017 HKBP LUBUK BAJA RESORT BATAM 
Modul ajar Pendidikan Agama Islam Kelas 8